బాధలో బావి మీద నిలబడి తాగిన మైకం లో వేదాంతం పాడుకుంటూ ఉంటాడు.
ఇంతలో ఆమె వస్తుంది. అప్పుడే మొదలవుతుంది వాన. ఆ బొట్టు చెరిగిపోతూ ఉంటే నుదిటి మీద చేయి అడ్డం పెడతాడు హీరో .
భర్త పొతే బొట్టు తీయాలన్న సంప్రదాయాన్ని విశ్వనాధ్ గారు సమర్ధించారు అనే కోణం లో చూసి ఈకలు పీకే వారికి ఆ దృశ్యం తప్పుగా కనిపించవచ్చు చూసే కళ్ళను బట్టే. అక్కడ సమర్ధించలేదు విమర్శించలేదు. అక్కడ చూడాల్సింది ఆచారం కాదు తాను చెప్పదల్చుకున్న విషయాన్ని ఎంత సున్నితంగా చూపించారు అన్న విషయాన్నీ
మనసుకి తడి తెలిసిన మనిషికి ఆ దృశ్యం హత్తుకుంటుంది. సినిమా అయిపోయినా ఆ దృశ్యాలు వెంటాడతాయి. చాలా ఏళ్ళ తర్వాత కలుసుకున్నాక తాను సంతోషంగా లేను అని తెలిస్తే భాధ పడతాడని ఆమె బొట్టు పెట్టుకొని రావడం . ఆమె సంతోషం లో తన సంతోషం వెతుక్కునే ప్రేమికుడి పాత్రలో అతను . టీవీ లో సాగర సంగమం సినిమా చూసిన చాలా రోజుల వరకూ ఆ సినిమా వెంటాడింది. ఆ తర్వాత ఎన్ని సార్లు చూశానో లెక్కలేదు.
ప్రేక్షకులకి పరిచయం లేని వయసు మళ్ళిన వ్యక్తి ని హీరో గా పెట్టి , కథానాయకి ని వేశ్య పాత్రలో చూపించి శంకరాభరణం తీసి ప్రేక్షకుల చేత నీరాజనాలు అందుకున్నారు. స్వాతి కిరణం లో అహం ఈర్ష్య తో రగిలిపోయే హీరో పాత్రలో ముమ్ముట్టి , అమాయకుడిగా స్వాతి ముత్యం లో కమల్ హాసన్. చెప్పులు కొట్టుకునే వ్యక్తి పాత్రలో అగ్ర హీరో చిరంజీవి ,సిరి వెన్నెల లో గుడ్డి వాడైనా హీరో, శోభన్ బాబు కున్న అందాల హీరో ఇమేజ్ కి భిన్నంగా నల్లగా అనాకారిగా చెల్లెలి కాపురం లో ఇలా చూపించినా అభిమానులు బ్రహ్మ రధం పట్టారు .
హీరో లకు ఆపాదించే హీరోయిజమ్ వెర్రిగా మారి సమాజం పై యువత పై చెడు ప్రభావం చూపిస్తున్నా నోరెత్తని కుహనా మేధావులు విశ్వనాధ్ గారి సినిమాలు సమాజం పై ఏ దుష్ప్రభావం చూపించాయని విరుచుకుపడుతున్నారు. హీరోయిన్ కి ప్లాస్టిక్ మేకప్ లు ఉండవు. హీరో మగతనాలు ఆకాశం లో నుండీ ఊడిపడేట్టుగా అసహజంగా నూ కూడా ఉండవు. తన చుట్టూ ఉన్న సమాజాన్ని తన సినిమాలో చూపించారు అదీ కళాత్మకంగా
తనని తానూ ఏమీ అభ్యుదయవాదిగా అయన ప్రకటించుకోలేదు సమాజాన్ని తన సినిమాలతో ఉద్దరించేస్తున్న అని చెప్పుకోలేదు. తనకి నచ్చిన కళని కలలుగా కన్నారు ఆ కలల్ని తనకి తెలిసిన సినిమా కళ ద్వారా కళాత్మకం గా తీశారు. హాయిగా సినిమా చూద్దాం అనుకునే సగటు ప్రేక్షకుడిని కట్టి పడేసే సినిమాలు తీశారు. అలాగని అవేమీ నేల విడిచి సాము చేయలేదు. ప్రతీ సినిమాలో అంతర్లీనంగా ఒక గొప్ప మానవతా భావాన్ని చూపించే ప్రయత్నం ప్రతి సినిమాలో చేశారు . కులాంతర వివాహాన్ని సమర్థిస్తూ సప్తపది తీశారు, ప్రేమ మనసుకు మాత్రమే అని వైకల్యం అడ్డం కాదని సిరిసిరి మువ్వ సిరివెన్నెల సినిమాలోకి చూపించారు, అహంకారం సాటి కళాకారులను ఎలా తొక్కేస్తుంది స్వాతి కిరణం లో చూపిస్తే, పెళ్లయి భర్తని పోగుట్టుకున్న స్త్రీకి ఓ మనసు ఉంటుందని తోడు కోరుకుంటుందని చూపించిన సినిమా స్వాతి ముత్యం . ఓ వేశ్య కి సహాయం చేయడం వల్ల సమాజం లో తనకున్న గుర్తింపుని ,వృత్తిని కూడా వదులుకున్న హీరో కథతో శంకరాభరణం. సుడి గుండాలు సినిమాలో విశ్వనాథ్ గారు అందించిన కధే కాదు ప్రతి మాట ఈరోజు సమాజానికీ వర్తిస్తూ ఆలోచింప చేస్తుంది. నేరమూ శిక్ష కూడా అలాంటిదే
ఓ సీత కధ, సీత మహాలక్ష్మి , సిరి వెన్నెల, శంకరాభరణం, స్వాతి ముత్యం ,స్వర్ణ కమలం ,స్వాతి కిరణం, సప్తపది శృతి లయాలు, జీవన జ్యోతి ,చెల్లెలి కాపురం ,సాగర సంగమం ఇలా చెప్పుకుంటూ పొతే ఎన్నో. చూసి ఎన్నేళ్లయినా అవి ఎప్పటికీ మనసులో గుర్తుండి పోతాయి సినిమా చూసి థియేటర్ బయటకి వచ్చేసి మర్చిపోయే మామూలు సినిమాలు కావు ఏవి.
అలాంటి కళాకారుడి విద్వత్తుకి ఈ రోజుకి పురస్కారం లభిస్తే ..తనలో లో కళను కాకుండా కులాన్ని మాత్రమే చూస్తున్న సో కాల్డ్ కుల గజ్జి మేధావులను చూసి జాలి వేస్తోంది.
యూనివర్సిటీ లో పిల్లని విప్లవ భావాలూ నూరిపోసి అడవులకు పంపి, జీతం తో పాటు భారీగా కొసర్లు సంపాదిస్తూ, తమ పిల్లని అమెరికాలకు పంపి , ధనువంతుల ఇళ్ల మధ్య లక్సరీ ఫ్లాట్ లో లో కులాసాగా ఓ చేత్తో బూర్జువా పెట్టుబడి దారి సిగిరెట్ లు పట్టుకుని విప్లవాలు కారాలు మిరియాలుగా నూరేసే ఏ ముద్దు గోపాలాల సర్టిఫికెట్ లు .. విశ్వనాధ్ గారికి అక్కర్లేదు.
ప్రేక్షకులు పట్టిన నీరాజనమే ఆయన కళకు నిజమైన సర్టిఫికెట్ ఎప్పుడో ఇచ్చేసింది. ఇప్పుడీ అవార్డు ఆయన్ను వరించి తనను తానూ గౌరవించుకొంది.
లాజికల్ లాజికల్ అంటూ వెతికే వాడికి మనిషి పుట్టుకలనూ అసభ్యత మాత్రమే కనిపిస్తుంది. అమ్మ తనాన్ని చూసే వాడికి పదినెలల అమ్మ కష్టం ప్రేమ కనిపిస్తుంది. చిత్రంగా రెండు వాదనలూ కరెక్టే. కానీ ఏది చూస్తున్నాం అనేది మాత్రం మన సంస్కారం నిర్ణయిస్తుంది.
No comments:
Post a Comment