కస్తూరి సింధూర

వసంతం వెలిగించే

ఓ  ఋతువు కోసం

ఆ  గూళ్ళన్నీ ఆశతో

ఎదురుచుస్తుంటాయి

సగం కాలిన దేహం లా

బీటలు వారిన  ఆ గోడల నిండా

చెల్లా చెదురైన వలస పక్షుల

చెమరింతల  కధల వ్యధలు

గుబురు పొదరిల్ల మధ్య పావురాళ్ళు

రాజకీయ క్రీనీడలో .పావులై  ఎగిరిపోయాయి

ఇప్పుడా తోటలో ఏ గులాబీ పూయడం లేదు

బహుశా  తోట కన్నీరు పెట్టిందేమో 

అక్కడక్కడా పలకరిస్తూ  మోడువారిన మొక్కలు

భూతల స్వర్గాన్ని వెక్కిరిస్తున్నాయి

ఎప్పుడు మొదలైందో ఈ  రుధిర వర్షం

లోయంతా ఇంకా కురుస్తూనే ఉంది

అలవాటుగా అదే వాటుగా

బహుశా  ఈ వర్షం ఇప్పట్లో ఆగేట్టు లేదు

ఆకాశం నిండా ముసురుకున్న

మత మౌడ్య మేఘాలు

ఇంకా చిక్కబడుతూనే ఉన్నాయి

ఉన్నట్లుండి   కొన్ని బుల్లెట్ల శబ్దాలు

ఓ సుదీర్ఘ నిశబ్ధం లో భయపెడుతూ వినిపిస్తుంటే

ఏరులై పారుతోన్న కన్నీళ్ళతో

లోయ వేడుకుంటోంది

గాయాల్ని కడిగేసే రోజు కోసం

చెల్లా చెదరై ఎగిరిపోయిన

గువ్వ పిట్టలు తిరిగి గూడు చేరే రోజు కోసం