ఓయ్ పోరాట యోధుడా

వంద కోట్ల భారతం లో 

అక్కడో ఎక్కడో ఒకటో రెండో 
చిన్న ఈదురు గాలి వీస్తే చాలు 
అసహనాల సునామీ ఆట
కొన్నాళ్ళు ఆడేసుకుంటాం
ఘర్ వాపసీలో 
అవార్డు వాపసీలో 
కొన్ని సానుభూతులు 
కొన్ని వ్యతిరేకతలు 
ఆవేశాక్షరాల్లో ముంచి 
దేశ జెండా పై ఆరేస్తాం 
భారత మాత కి జై 
కొట్టమంటూ ఒకడు 
కొట్టనంటూ ఒకడు 
సమస్యల చిట్టా రూపరేఖలేవీ 
మారబొవన్న నిజాన్ని 
అవసరార్ధం ఇష్టం గా మర్చిపోతూ
జీవన్మరణ సమస్య చేసేస్తాం 
వర్గీకరింపబడ్డ సమస్యల్లో 
మన వర్గం జెండాలు మాత్రమె ఏరుకుంటూ 
మండే సూర్యలమంటూ 
మైకు ముందు రంకెలేస్తాం 
~ ~
ఓయ్ పోరాట యోధుడా ||
ఈ విషయం ఎప్పుడైనా ఆలోచించావా 
అన్నమై పుట్టాల్సిన అన్నదాత 
ఉరికొయ్యకు వేలాడుతుంటే 
వందకోట్ల అన్నపూర్ణ భారతం 
పురుగుల మందుల కూరలతో 
ప్లాస్టిక్ బియ్యాన్ని వండుకు తింటోంది 
మైకు ముందు గొంతెత్తి ఉపన్యాసాలు ఇద్దాం సరే
గొంతు తడపడానికి కాస్త స్వచ్చమైన నీళ్లేవి 
వాడెవడో కొట్టాడనో వీడెవడో తిట్టాడనో 
ఆత్మ గౌరవ పోరాటాలు చేద్దాం సరే 
అందుకు ఇంకొన్నాళ్ళు బతికుండాలిగా 
మరి దాని సంగతేం చేద్దాం

(ప్లాస్టిక్ బియ్యం బహిరంగం గా కొన్నేళ్లుగా సూపర్ మార్కెట్లో సైతం అమ్ముతున్నారని విన్న వార్త చూసి . దేశాన్ని పట్టి పీదిస్తోన్న కల్తీ , నేతల అవినీతి , నిరుద్యోగం లాంటి ఎన్నో పెద్ద సమస్యలు వదిలేసి చిన్న సమస్యల పై పెద్ద పెద్ద పోరాటాలు చేస్తున్న వారికి అంకితం )